Inhlekelele eMpumalanga Kapa: Owesifazane Ubulawe Ngabaphangi Esalungiselela Umngcwabo Kamyeni Wakhe
Inhlangano yomphakathi waseGcuwa (Butterworth) eMpumalanga Kapa ishaqeke yaphinde yaba semunjini kulandela ukufa kabuhlungu kukaThabisa Mnqwazana (46), obulawe ngesikhathi kuhlaselwa ikhaya lakhe ekuqaleni kwalonyaka.
Ngokwemibiko ephumile, lesi senzakalo esinyantisa igazi senzeke ngomhlaka 27 Januwari 2026.
Okwenza lolu daba lube buhlungu nakakhulu ukuthi isehlo senzeke ngesikhathi uMnqwasana nomndeni wakhe besebulungwini obukhulu, njengoba ayephakathi kwamalungiselelo okungcwaba umyeni wakhe. Isikhathi okwakufanele ngabe ngeso kusekelana, ukulila nokubambisana, siphenduke isikhathi sobuhlungu obunwebekile ngenxa yalesi senzo sobudlova.
Kuthiwa abasolwa abathathu bangene kuleli khaya ngenkani bafuna izinto zenani eliphezulu, lapho bafike bathatha imali kanye namakhadi asebhange. Isimo sibe sesishintsha kabi ngesikhathi uMnqwazana edutshulwa.
Isizathu esidale ukuthi adutshulwe asikacaci kahle njengoba uphenyo lusaqhubeka, kodwa ukulahlekelwa yimpilo yakhe kushiye isilonda esingeke siphole emndenini nasekuhlaleni.
Ngemva kokuhlasela, laba basolwa abathathu baphunyukile endaweni yesigameko futhi abakaboshwa. Amaphoyisa aseqale uphenyo lwaleli cala kodwa kuze kube manje akukabikwa muntu oboshiwe. Iziphathimandla ziyanxusa kunoma ubani ongaba nolwazi olungaholela ekuboshweni kwalaba baphangi ukuba axhumane nabo ngokushesha.
Lesi sigameko siphakamise ukukhathazeka okukhulu ngezokuphepha ezindaweni zokuhlala, ikakhulukazi ngesikhathi imindeni isesimweni esibucayi njengalokhu kokufelwa lapho isuke ingazilindele ukuhlaselwa.
Amalungu omphakathi azwakalise intukuthelo enkulu, efuna ukuba ubulungiswa benzeke ngokushesha nezindlela zokuvikela izakhamuzi ziqiniswe.
Abangani, omakhelwane, nezihlobo bachaze uThabisa Mnqwazana njengowesifazane onothando, oqinile, nobezinikela ngokuphelele emndenini wakhe.
Ukushona kwakhe ngale ndlela ebuhlungu kushiye abaningi bekuthola kunzima ukwamukela lolu lahleko olunzima kangaka. Njengamanje, umndeni wakwaMnqwazana ubhekene nomsebenzi onzima wokulilela amalungu amabili omndeni ngesikhathi esisodwa. Umphakathi umi nabo kulesi sikhathi esinzima, ngethemba lokuthi labo abenze lobu bugebengu bazobanjwa maduze bajeze.
